ENDL do IES Xelmírez II
Xa está aquí Hydn. Xa chegou ao IES Xelmirez II para poñerlle o ramo a este curso. Música urbana, electrónica; letras en galego que salfire co inglés. Produción audiovisual moi coidada e ela, absolutamente entregada á rapazada de 4ESO que conquistou en nada. Alegría e baile para rematar o curso.
O pasado 15 de xuño, no marco de difundir a música galega entre o noso alumnado, a rapazada de 2ESO desfrutou dunha agradable e interesante conversa cun dos nosos músicos emerxentes: Xián Pais. Falaron de músicas urbanas, de rap e, por certo, cantou e cantaron con el varios temas. Unha marabilla. Longa vida para a nosa música.
Co gallo de numerosas actividades relacionadas co 8M onte o alumnado de 2ESO tivo a fortuna de poder escoitar a Devacas; e non só cantar esas cancións de deconstrución de tópicos a través do humor senón sobre todo contar as súas experiencias como mulleres que se adican á música dende hai 10 anos. Bravas.
Hoxe o alumnado de 4ESO tivo un fin de trimestre que quizais non vai esquecer pronto pois partillaron unha hora con Xmaseda36, un mozo da Mariña que xa é coñecido por moitos deles. Falaron de música galega, de lingua, de literatura, de emocións e, por suposto, de rap. E amais tiveron un agasallo xa que foi moi xeneroso e cantoulles unha peza sobre unha base que traía. Moitas fotos e sinaturas ao final do acto e agardamos e o seu disco Pontes sexa un éxito. Moitas grazas
O pasado 18 de xuño rematamos as actividades do EDL coa presenza dun artista do que gostamos moito: Mondra. Poucos días despois de encher por dúas veces a sala Capitol de Santiago, tivemos a sorte de telo no centro para compartir con nós as súas experiencias na música e tamén parte da súa ampla e marabillosa produción audiovisual. E, por suposto, tamén nos botou unhas coplas. Un agasallo ben fermoso de fin de curso
O venres 9 de maio o alumnado de 2ESO desfrutou dunhas das voces máis impresionantes da escena musical galega: Su Garrido Pombo
Velaquí:
A semana despois de Pascua tivemos no centro unha ducia de alumnas e alumnos do AE Vale do Tamel de Barcelos, Na xornada do xoves 24 de abril, as nosas alumnas de 1ESO do EDL déronlles un curso de regueifas cunha mestrá inusitada. E despois, o alumnado do EDL de 1 BACH ensinoulles a botar un punto.
E ao día seguinte celebramos o 25 de abril na praza Zeca Afonso. E cantamos o Grândola mais definitivamente temos que ensaiar máis
O 24 de abril o alumnado de 3ESO tive o pracer de escoitar unha das voces máis prometedoras do noso cante lírico, a luguesa Julia Portela. Formada en Londres e acabada de chegar de estar un ano en Capetón na ópera desa cidade, explicoulles á rapazada un montón de aspectos interesantes. E por suposto que cantou. Vaia marabilla!
E o 25 de marzo, con Pauliña na aula de 1ESO descubriron o seu inmenso talento. Estamos seguros amais que vai ser unha magnífica profe.
O pasado 19 de marzo un grupo de 2ESO do noso alumnado puido desfrutar e aproveitar dun obradoiro de regueifas da man, unha vez máis, dunha das grandes desta discipliena artística: Lupe Blanco.
Este luns 8 de abril o alumnado de 2ESO tivo a sorte de poder asistir no centro a un concerto de Pauliña que, en formato acústico, tocounos algunhas das cancións máis coñecidas do seu repertorio. Agora xa só queda ir escoitala con toda a súa banda. E amais tivemos convidados de luxo: dez alumnos do Agrupamento Diogo Cao de Vila Real (Portugal) e dez alumnas da Obershule Roter Sand de Bremen. Un pracer. Velaquí unha pequena mostra:
O pasado mércores 13 de decembro o alumnado de 2ºESO gozou dun obradoiro de regueifa grazas á colaboración do Departamento de Lingua de Galega do Concello de Santiago. Desta volta estiveron acompañados por dous dos nosos mellores regueifeiros: Lupe e Josito. E o nosa alumnado deixou claro unha cousa: a regueifa ten futuro. Velaí unha pequena mostra:
Este martes 14 de novembro estou seguro que boa parte do noso alumnado o vai lembrar polo que desfrutou no concerto desta banda que, dende Bruxelas, non só aprecian enormemente a nosa cultura senón que tamén fan música. No medio da súa xira 100 VOLTAS ( non a perdades) deron +1 VOLTA e chegaron a Salgueirinoños para pórnos a cantar e bailar como poucas veces. Grazas pola vosa xenerosidade e compromiso con nós, coa nosa cultura, coa nosa xente e coa nosa educación. Un vrai plaisir.
Desculpade o vídeo que non honra o vivido hoxe pero é para que vos deades unha idea.
O pasado venres 3 de febreiro o alumnado de 3ESO desfrutou dun acústico de quen, estou seguro, ides escoitar falar en breve: Noelia Perpetuo. Gañadora do último Quero cantar cativou a rapazada coas súas melodías en galego e portugués, inspiradas en textos poéticos. Aquí tedes un pequeno resumo da actividade. Quédadevos co seu nome
O pasado xoves 3 de novembo o alumnado de 2ESO tivo a sorte de asistir a un obradoiro de regueifa con Nuria e Josiño, a nova e a máis veterana xeración da xente que regueifea en Galicia. Foron dous obradoiros realizados co apoio e colaboración inestimable do Departamento de Lingua Galega do Concello de Santiago. Saíron moitas regueifas e ben interesantes. Así que, ata o Enreguéifate!Velaquí unha pequeniña mostra delas:
Despois de dous anos sen poder desfrutar de música ao vivo no centro, o pasado venres 11 de febreiro o alumnado de 3ESO desfrutou dun concerto moi especial con Caamaño & Ameixeiras. E, coma sempre, o noso alumnado subiu con elas ao escenario compartir tanta arte. Agradecémoslle enormemente a súa implicación co noso proxecto e, sobre todo, que compartisen connosco 50 minutos inesquecibles. Vaia artistazas temos en Galicia! Para fachendear. Velaquí uns anaquiños.
O pasado 27 de outubro participamos no Auditorio de Galicia no Festival aRi(t)mar, iniciativa da Escola Oficial de Idiomas que tes por obxectivo difundir a música e a poesía galego e portuguesa dentro da idea de establecer vínculos entre a lusofonía. Desta volta, alumnado e profesorado do centro compartiu a alegría dos premiados. Na foto, cunha delas, Guadi Galego.
